Barbara Hershey

Barbara Hershey (doğum adı Barbara Lynn Herzstein; 5 fevral 1948) amerikalı aktrisadır. 50 ildən çox davam edən karyerası ərzində o, televiziya və kinoda vestern və komediya da daxil olmaqla, müxtəlif janrlarda çoxsaylı rollar ifa edib. Aktyorluq fəaliyyətinə 1965-ci ildə, 17 yaşında başlayan aktrisa 1980-ci illərin ikinci yarısına qədər tənqidçilərin böyük rəğbətini qazana bilməmişdi. Həmin dövrdə Chicago Tribune qəzeti onu "Amerikanın ən yaxşı aktrisalarından biri" adlandırmışdı. Hershey A Killing in a Small Town (1990) filmindəki roluna görə "Mini-serial və ya televiziya filmində ən yaxşı qadın oyunçu" kateqoriyasında Emmy və Qızıl Qlobus mükafatlarını qazanıb. O, The Last Temptation of Christ (1988) filmindəki Məryəm Maqdalena və The Portrait of a Lady (1996) filmindəki rollarına görə "Ən yaxşı ikinci plan qadın oyunçu" nominasiyasında Qızıl Qlobus mükafatına namizəd göstərilib. Sonuncu filmə görə o, "Ən yaxşı ikinci plan qadın oyunçu" kateqoriyasında Oskar mükafatına namizəd olub və Los Angeles Film Critics mükafatını qazanıb. Aktrisa Shy People (1987) və A World Apart (1988) filmlərindəki rollarına görə Kann Film Festivalında iki dəfə "Ən yaxşı qadın oyunçu" mükafatına layiq görülüb. O, Woody Allen-in Hannah and Her Sisters (1986) filmində rol alıb və bu filmə görə Britaniya Akademiya Film Mükafatının "Ən yaxşı ikinci plan qadın oyunçu" nominasiyasına namizəd göstərilib. Garry Marshall-ın Beaches (1988) melodramında çəkilən aktrisa, Darren Aronofsky-nin Black Swan (2010) filmi ilə ikinci dəfə Britaniya Akademiya Film Mükafatına namizədlik qazanıb.