Matthew McConaughey

Metyu Devid Makkonahi (4 noyabr 1969-cu il təvəllüdlü) amerikalı aktyordur. O, karyerasında ilk böyük uğurunu "Dazed and Confused" (1993) yeniyetməlik komediyasındakı ikinci dərəcəli rolu ilə qazanıb. Bir neçə ikinci dərəcəli roldan sonra, baş rolda ilk uğuru "A Time to Kill" (1996) hüquqi dramı ilə gəlib. Karyerası "Contact" (1997) elmi-fantastik filmi, "Amistad" (1997) tarixi dramı və "U-571" (2000) müharibə filmindəki baş rollarla irəliləyib. 2000-ci illərdə Makkonahi "The Wedding Planner" (2001), "How to Lose a Guy in 10 Days" (2003), "Failure to Launch" (2006), "Fool's Gold" (2008) və "Ghosts of Girlfriends Past" (2009) kimi romantik komediyalarda çəkilərək seks-simvol kimi tanınmağa başlayıb. 2011-ci ildə, iki illik fasilədən sonra Makkonahi "The Lincoln Lawyer" hüquqi dramı ilə daha dramatik rollara keçid edib. 2012-ci ildə o, "Magic Mike" filmində striptizçi və "Mud" filmində qaçqın rolları ilə daha geniş rəğbət qazanıb. Makkonahinin "Dallas Buyers Club" (2013) bioqrafik filmində QİÇS diaqnozu qoyulmuş kovboy Ron Vudruf obrazını canlandırması ona geniş tənqidçi rəğbəti və "Ən yaxşı kişi roluna görə" Akademiya Mükafatı da daxil olmaqla çoxsaylı mükafatlar qazandırıb. Ardınca o, "The Wolf of Wall Street" (2013) filmində ikinci dərəcəli rol alıb və HBO-nun "True Detective" (2014) cinayət antologiyası serialının birinci mövsümündə Rust Koul obrazını canlandırıb; bu rola görə o, "Dram serialında ən yaxşı baş rol aktyoru" nominasiyasında Praymtaym Emmi mükafatına namizəd göstərilib. Onun sonrakı film rollarına "Interstellar" (2014) və "The Gentlemen" (2019) filmlərindəki baş rollar, həmçinin "Kubo and the Two Strings" (2016), "Sing" (2016) və "Sing 2" (2021) animasiyalarındakı səsləndirmə işləri daxildir.