Tamela Mann

Tamela Jean Mann (qızlıq soyadı Johnson) amerikalı qospel ifaçısı, mahnı müəllifi və aktrisadır. O, aktyor David Mann ilə evlidir. O, 1999-cu ildə Tyler Perry tərəfindən kəşf edildikdən sonra aktyorluğa başlayıb. 2000-ci ildə I Can Do Bad All By Myself səhnə tamaşası ilə debüt edib. Növbəti il Kingdom Come komediya filmində çəkilib. Daha sonra Perrinin Meet the Browns, Madea's Family Reunion, Madea's Class Reunion, Diary of a Mad Black Woman və What's Done in the Dark tamaşalarında rol alıb. 2005-ci ildə eyniadlı tamaşadan ilhamlanaraq çəkilmiş romantik komediya-dram filmi Diary of a Mad Black Woman-da rol alıb. O, 2008-ci ildə çəkilmiş Meet The Browns filmində həmin rolunu yenidən canlandırıb. Növbəti il 2011-ci ilə qədər yayımlanan TBS komediya serialı Meet the Browns-da əsas rollardan birini ifa etməyə başlayıb. O, Madea Goes to Jail (2009) və Madea's Big Happy Family (2011) filmlərində də rol alıb. 2012-ci ildə 1976-cı ildə çəkilmiş eyniadlı filmin remeyki olan Sparkle musiqili filmində Whitney Houston və kino debütünü edən müğənni Jordin Sparks ilə birlikdə rol alıb. O, 2014-cü ildə çəkilmiş First Impression dram filmində əsas rollardan birini ifa edib, həmçinin həyat yoldaşı ilə birlikdə 2018-ci ilin Milad filmi Merry Wish-Mas-ın prodüseri olub və filmdə rol alıb. 2021-ci ildə növbəti bayram filmi olan Soul Santa-da baş rolu canlandırıb. 2015–2017-ci illərdə həyat yoldaşı ilə birlikdə Bounce TV-də yayımlanan Mann & Wife komediya serialında rol alıb. 2020-ci ildə BET-in Tyler Perry's Assisted Living sitcomunda Cora Simmons roluna qayıdıb. 2022-ci ildə Netflix platformasında yayımlanan A Madea Homecoming filmində görünüb. Daha sonra 2005-ci ildə eyni adlı səhnə müziklinin ekran adaptasiyası olan The Color Purple filminin aktyor heyətinə daxil edilib. Mann müğənni kimi karyerasına Kirk Franklin and the Family qospel qrupunun üzvü olaraq başlayıb. Franklinin qrupunda olduğu müddətdə bir neçə mahnıda, o cümlədən "Now Behold the Lamb" və Mary J. Blige, Crystal Lewis, R. Kelly və Bono-nun da iştirak etdiyi "Lean on Me" mahnılarında solo ifaçı kimi çıxış edib. O, solo karyerasına Gotta Keep Movin (2005) və The Master Plan (2009) albomlarını buraxmaqla başlayıb. Onun üçüncü studiya albomu Best Days Billboard-un qospel albomları cədvəlində birinci yerə yüksəlib və RIAA tərəfindən Qızıl sertifikatla təltif olunub. Albomun əsas sinqlı "Take Me to the King" ona Ən yaxşı qospel/müasir xristian musiqisi ifası nominasiyasında Grammy mükafatı qazandırıb. Onun dördüncü studiya albomu One Way (2016) də Billboard-un qospel albomları cədvəlində birinci yerə yüksəlib. Albomdan çıxan "God Provides" sinqlı isə 2017-ci ildə ona Ən yaxşı qospel ifası/mahnısı nominasiyasında Grammy mükafatı qazandırıb. Grammy mükafatı ilə yanaşı, o, çoxsaylı NAACP Image Awards mükafatları, Billboard Music Award və BET Award da daxil olmaqla bir sıra digər mükafat və fəxri adlara layiq görülüb. 2022-ci ildə Black Music & Entertainment Walk of Fame-ə daxil edilib. Onun Billboard-un Gospel Airplay cədvəlində birinci yerə yüksələn ümumilikdə doqquz sinqlı var. "Take Me to the King" mahnısı isə cədvəlin zirvəsində 25 həftə qalıb.