Tracks, avstraliyalı yazıçı Robyn Davidsonun eyniadlı memuarından uyğunlaşdırılıb. Mia Wasikowskanın Davidson obrazını canlandırdığı film, yazıçının 1977-ci ildə iti və dörd dəvə ilə Avstraliya səhralarında etdiyi səyahətdən bəhs edir. Adam Driver isə Davidsonun səyahətini lentə alan National Geographic fotoqrafı Rick Smolan rolundadır. Film heyranedici görüntülərlə nəfəs kəsən bir səyahəti təsvir edərkən, gənc bir qadının mübarizəsi fonunda feminizmdən tutmuş, hadisələrin baş verdiyi coğrafiyaya görə müstəmləkəçiliyə qədər bir çox mövzuya toxunur. Rejissor John Curran Robyn Davidsonun kitabını 80-ci illərdə, Nyu-Yorkdan Avstraliyaya köçdüyü dövrdə kəşf edib. Gənc qadının özünü kəşf etmək üçün çıxdığı bu yolu öz həyat yolu ilə çox oxşar hesab edən Curran, illər sonra bu ekran işini ərsəyə gətirməkdən böyük həyəcan duyub.