Film, Birinci Dünya Müharibəsi dövründə Rusiya İmperator Donanmasında admiral kimi xidmət edən, Bolşevik İnqilabından sonra isə Ağ Ordunun komandanlığını öz üzərinə götürərək bolşeviklərə qarşı vuruşan Aleksandr Vasilyeviç Kolçakın romantik münasibətlərindən bəhs edərkən, eyni zamanda Rusiya tarixinə fərqli bir bucaqdan yanaşır. Bolşevik İnqilabını və kommunist idarəçiliyini qərəzli şəkildə tənqid etdiyi iddia edilən film, vətən xaini hesab olunan admiral Kolçakı qəhrəman kimi təqdim etdiyi üçün etirazlara səbəb olub. Xüsusilə rus tarixçiləri tərəfindən tənqid olunmaqla yanaşı, filmin afişaları naməlum şəxslər tərəfindən məhv edilib. 9 oktyabr 2008-ci ildə Rusiyada nümayiş olunan və altı milyondan çox insan tərəfindən izlənilən film, tənqidlərlə yanaşı, aktyorların ifası ilə də bəyənilib.