1950-ci illərdə İtaliyanın kiçik bir adasındayıq. Dünyaca məşhur çilili kommunist şair Pablo Neruda siyasi səbəblərdən ölkəsindən kənarda yaşamaq məcburiyyətində qaldığı sürgün dövrünün bir hissəsini burada keçirir. Məktublarını çatdırmaqla vəzifəli sadəlövh poçtalyon Mario qısa müddətdə Neruda ilə səmimi bir dostluq qurur. Ustad şairin verdiyi məsləhətlərlə Mario həm daxilindəki şairi kəşf edir, həm də gözəl Beatricenin qəlbini qazanır. Neruda gənc adama sosialist ideyalarını aşılayır və özünü kəşf etməsinə kömək etdiyi Mario üçün getdikcə bir ilaha çevrilir. Lakin ustad şairin arxasınca düşən siyasi rəqibləri onun bir yerdə uzun müddət qalmasına mane olur. Ayrılıq vaxtı yaxınlaşır.