Rejissor Qari Marşalın rəhbərliyi ilə Culiya Roberts və Riçard Girin baş rollarını paylaşdığı "Pretty Woman" (Özəl Bir Qadın) filmi böyük rəğbət qazanmışdı. Bir neçə il sonra bu üçlük yenidən bir araya gələrək "Runaway Bride" filmini ərsəyə gətirdi. Film ABŞ-da romantik komediya janrında indiyədək çəkilmiş ən çox gəlir əldə edən ekran əsərlərindən biri oldu. Ayk Qrem Nyu-Yorkda çalışan və ciddi problemlərlə üzləşən bir jurnalistdir. Onun rəisi keçmiş həyat yoldaşıdır, yaradıcılıq böhranı keçirir və qısa müddətdə yeni bir yazı hazırlamalıdır. Ayk Merilend ştatının kiçik bir qəsəbəsində tez-tez nişanlanan, lakin hər dəfə toy günü qaçan Meqqi Karpenter haqqında eşidir və onunla bağlı bir silsilə məqalə yazmağa qərar verir.