Marwan Kenzari

Mervan Kenzari 16 yanvar 1983-cü ildə Niderlandın Lahey şəhərində anadan olub. Tunis əsilli ailənin övladı olaraq Niderlandda böyüyən Kenzari gənclik illərində futbol və küçə mədəniyyəti ilə sıx bağlı həyat sürüb. Onun aktyorluqla tanışlığı həmin dövrdəki sevgilisinin onu bir musiqili tamaşanın seçiminə yazdırması ilə təsadüfən baş verib. Bu təcrübə onun daxilindəki səhnə sənətinə olan həvəsi alovlandırıb və o, 2009-cu ildə Niderlandın ən nüfuzlu ali məktəblərindən biri olan Maastrixt Dramatik Sənətlər Akademiyasını bitirib. Məzun olduqdan sonra Niderland teatr səhnələrində və televiziya layihələrində qısa müddətdə özünə yer tapıb. Lakin onu ölkəsində ulduza çevirən və karyerasında dönüş nöqtəsi olan rol 2013-cü ildə çəkilmiş Wolf filmindəki çıxışı olub. Filmdə kikboksinq istedadı ilə cinayət dünyası arasında qalan Majid adlı gənci canlandırıb. Bu rol üçün keçirdiyi fiziki dəyişiklik və nümayiş etdirdiyi təsirli performans ona Niderland Film Festivalında Ən Yaxşı Aktyor nominasiyası üzrə Qızıl Dana mükafatını qazandırıb. Bu uğur onun üçün beynəlxalq kino dünyasının qapılarını açıb. Hollivuda keçid edən Kenzari qısa müddət ərzində müxtəlif janrlarda çəkilmiş irimiqyaslı layihələrdə rol almağa başlayıb. O, Ben-Hur (2016) və Tom Cruise ilə baş rolu bölüşdüyü The Mummy (Mumya) (2017) kimi filmlərdə çəkilib. Kenneth Branaghın rejissoru olduğu Murder on the Orient Express (Doğu Ekspresində Cinayet) (2017) filmindəki rolu ilə də diqqət çəkib. Lakin onu dünya miqyasında geniş auditoriyaya tanıdan rol Disneyin 2019-cu ildə çəkdiyi canlı aktyorlarla ekranlaşdırılmış Aladdin filmi olub. Filmdə canlandırdığı mənfi obraz Cafer onun xarizmatik və təhlükəli rolların öhdəsindən nə qədər uğurla gəldiyini nümayiş etdirib və performansı böyük rəğbət qazanıb. Aksiyon janrındakı uğurunu 2020-ci ildə Netflix-in məşhur The Old Guard filmi ilə möhkəmləndirib. Filmdə Xaç yürüşlərindən bəri birlikdə döyüşən ölümsüz döyüşçülərdən biri olan Joe (Yusuf Al-Kaysani) obrazını canlandırıb. Joenin tərəfdaşı Nicky (Luca Marinelli) ilə münasibəti filmin ən çox sevilən cəhətlərindən birinə çevrilib. Son olaraq 2022-ci ildə Dwayne Johnsonla birlikdə DC-nin superqəhrəman filmi Black Adamda mənfi obraz Sabbac rolunu canlandıraraq irimiqyaslı filmlərdəki mövqeyini daha da möhkəmləndirib. Mervan Kenzari həm dramatik rollardakı dərinliyi, həm də aksiyon filmlərindəki fiziki hazırlığı sayəsində qısa müddətdə Hollivudun ən çox tələb olunan beynəlxalq aktyorlarından birinə çevrilib.