Gani Müjde

Gani Müjde (27 noyabr 1959-cu ildə İstanbulda anadan olub) — türk yazıçısı, karikaturaçısı, ssenaristi, rejissoru və aparıcısıdır. Güngören İzzet Ünver Liseyini və Mimar Sinan Universitetinin Kino-Televiziya fakültəsini bitirib. Kosovo-Prizren köçkünü olan ailənin dördüncü və sonuncu övladıdır. Orta məktəb illərində karikaturaya olan marağı səbəbilə Gırgır jurnalına gedib-gəlir, zamanla isə jurnalda işləməyə başlayır. Təxminən səkkiz il Gırgır və Fırt jurnallarında çalışıb. Laklak adlı jurnalda bir müddət redaktorluq edib. Daha sonra bir qrup dostu ilə birlikdə oradan ayrılaraq Limon jurnalını təsis edib. Bu jurnalda “Peynir Gemisi” başlığı altında mütəmadi yazılar yazmağa başlayıb. Tükenmezkalem adlı yazı və prodüserlik şirkəti yaradıb. Sənətçi Belma Canciğer ilə evlidir. Ece Su və Arda adlı iki övladı var.