Zəngin, ağıllı və subay Emma Woodhouse həyatından son dərəcə məmnundur və nə evliliyə, nə də eşqə ehtiyac duyur. Onun ən sevdiyi məşğuliyyət isə başqalarının şəxsi həyatına qarışmaqdır. Yaxın dostu cənab Knightley-nin bütün xəbərdarlıqlarına məhəl qoymayaraq, himayəsinə götürdüyü Harriet Smith üçün uyğun bir namizəd tapmağa çalışdıqda, qurduğu planlar alt-üst olur və gözlənilməz nəticələrlə üzləşir. Jane Austen-in 1815-ci ildə işıq üzü görən "Emma" romanı bir çöpçatanlıq hekayəsi kimi tanınır. Lakin dərzinin öz söküyünü tikə bilmədiyi kimi, Emma Woodhouse-un da öz eşq həyatı olduqca qarışıq bir hal alır.