JJ Feild

John Joseph Feild (1978-ci ildə anadan olub), daha çox JJ Feild kimi tanınan britaniyalı-amerikalı kino, televiziya və teatr aktyorudur. O, televiziya karyerasına 1999-cu ildə başlayıb. Feild Philip Pullmanın “The Ruby in the Smoke” və “The Shadow in the North” əsərlərinin televiziya adaptasiyalarında Fred Garland obrazını canlandırıb. 2007-ci ildə televiziya filmi “Northanger Abbey”də Henry Tilney rolunda çəkilib. Növbəti il “Ring Round the Moon” tamaşasının quruluşunda iştirak edərək Vest-End səhnəsində debüt edib. 2014–2016-cı illərdə “Turn: Washington's Spies” serialında mayor John André obrazını canlandırıb. Feildin filmoqrafiyasına “Telstar” (2009), “Captain America: The First Avenger” (2011), “Austenland” (2013) və “Professor Marston and the Wonder Women” (2017) filmləri daxildir.