Ceyms Bondun bu dəfəki macərası Şimal və Cənubi Koreya arasındakı neytral zonada yerləşən mina sahəsində baş verən hava yastıqlı qayıq təqibi ilə başlayır. Bond fəlakətlə nəticələnə biləcək müharibənin qarşısını almaq və xaini tapmaq üçün Honkonqdan Kubaya, oradan isə Londona qədər dünyanı qarış-qarış gəzir. Bu müddətdə yolu hər Bond filmində olduğu kimi, macəranın əsas qəhrəmanlarından olan gözəl xanımlar Jinx və Miranda Frost ilə kəsişir. Psixopat və meqaloman Qustav Qreyvs və onun sağ əli Zao ilə hesablaşmaq üçün İslandiyaya yollanan Bond, düşmənin buzdan tikilmiş sarayına sızır və yeni texnologiya ilə yaradılmış son dərəcə təhlükəli bir silahla üz-üzə gəlir. Bond sonda əsl düşməni ilə hekayənin başladığı yer olan Koreyada qarşılaşır.