張國榮

Cheung Kwok-wing (çincə: 張國榮, ingiliscə adı: Leslie, 12 sentyabr 1956 – 1 aprel 2003) Honq-Konq kanadalı müğənni və aktyor idi. Honq-Konqda doğulan Leslie Cheung 1971-ci ildə Birləşmiş Krallığa köçərək Lids şəhərində məskunlaşdı və burada universitetə daxil olaraq moda dizaynı üzrə təhsil almağa başladı. Təhsilini başa vurduqdan sonra Honq-Konqa qayıtdı və 1977-ci ildə həvəskar müğənnilər arasında keçirilən ATV Asiya Musiqi Müsabiqəsində iştirak edərək ikinci yeri qazandı. Növbəti il o, ilk albomu olan I Like Dreaming-i buraxdı. Tezliklə televiziya proqramlarında görünməyə başladı və ilk film rolunu Erotic Dreams of the Red Chamber (1978) filmində aldı. Bu erotik ekran əsərini Cheung sonralar özü “utancverici fəlakət” adlandırmışdı. 1977-ci ildən ölümünədək davam edən 26 illik karyerası ərzində Cheung 40-dan çox musiqi albomu buraxıb və 56 filmdə rol alıb. O, 1980-ci illərdə Kantopopun simasını formalaşdıran ən görkəmli qabaqcıllardan biri idi. Onun Summer Romance (1987) və Most Beloved (1995) studiya albomlarının hər biri 300 mindən çox nüsxə satılıb və bu albomlar ərazidə bütün zamanların ən çox satılan albomları sırasındadır. Musiqidən əlavə, Cheung A Better Tomorrow (1986) və A Chinese Ghost Story (1987) kimi filmlərlə bütün Asiyada şöhrət qazandı. O, Days of Being Wild (1990) filmindəki roluna görə 1991-ci ildə Honq-Konq Film Mükafatlarında Ən yaxşı aktyor mükafatını qazandı. Onun 1990-cı illərdə aktyorluğa yönəlməsi o dövrün mühafizəkar kino sənayesində qəribə obrazları canlandırması ilə diqqət çəkirdi. O, Honq-Konqda homoseksual rolları, məsələn, Wong Kar-wai-nin Happy Together filmindəki rolu, üzərinə götürməyə razı olan azsaylı aktyorlardan biri idi. Həmçinin Chen Kaige-nin 1993-cü ildə Kann Film Festivalında Qızıl Palma budağı qazanan Farewell My Concubine filmində əks cinsin geyimində opera ifaçısını canlandırmışdı. Leslie Cheung 1 aprel 2003-cü ildə 46 yaşında Honq-Konqdakı Mandarin Oriental Hotelin 24-cü mərtəbəsindən atlayaraq intihar etdi. Geridə qoyduğu məktubda depressiyadan əziyyət çəkdiyini bildirmişdi.