Metin Coşkun

Metin Coşkun 1948-ci ildə İstanbulda anadan olub. Sənət fəaliyyətinə 1970-ci ildə başlayan usta aktyor karyerasının böyük hissəsini teatra həsr edib, xüsusilə Ankara Sanat Tiyatrosu (AST) nəzdində 60-dan çox tamaşada rol alıb və bir çox tamaşaya quruluş verib. Teatr səhnəsindəki intizamı, dərinliyi və təcrübəsi onu türk teatrının ən hörmətli simalarından birinə çevirib. Televiziya və kino dünyasındakı fəaliyyətində əsasən xarakterik, avtoritetli və sanballı rolları ilə tanınan Coşkun “İkinci Bahar” və “Bizim Aile” kimi klassikləşmiş ekran əsərlərində rol alıb. Lakin geniş kütlələr tərəfindən yadda qalan şəkildə tanınması 2012-ci ildə çəkilmiş kult serialı “Suskunlar”da canlandırdığı “Belalı Naim” obrazı ilə baş verib. Bu rolu beynəlxalq uğur qazanan və “Emmy” mükafatına layiq görülən “Kara Sevda” serialındakı Hakkı Alacahan obrazı izləyib. Usta aktyor buradakı ifası ilə də böyük rəğbət qazanıb. Kinoda isə Cem Yılmazın “Pek Yakında” filmi və “Barış Akarsu: Merhaba” kimi layihələrdə rol alıb. Metin Coşkunun son dövrlərdə ən çox səs-küyə səbəb olan və aktyorluq gücünü bir daha sübut etdiyi ifası TRT 1 ekranlarında yayımlanan psixoloji dram “Masumlar Apartmanı” (2020–2022) serialındakı Hikmet Derenoğlu obrazıdır. Şəkərli diabetdən əziyyət çəkən, keçmişdə övladları üzərində avtoritar təzyiq qurmuş, lakin qocalığında öz düşüncələri, xəstəlikləri və keçmişin peşmanlıqları ilə mübarizə aparan bir atanı canlandırdığı bu rol tamaşaçılar və tənqidçilər tərəfindən yüksək qiymətləndirilib. O, obrazın həm qorxuducu, həm də acınacaqlı cəhətlərini böyük tarazlıqla əks etdirib. Rəqəmsal platformalarda Haluk Bilginer ilə birlikdə rol aldığı “Şahsiyet” və yaxın zamanda “Magarsus” kimi nüfuzlu layihələrdə yer alan, televiziyada isə “Ömer” serialındakı Tahir obrazı ilə tamaşaçı qarşısına çıxan Metin Coşkun yarım əsrdən artıq davam edən karyerası, teatr mənşəli güclü texnikası və hər rolu inandırıcı edən ustalığı ilə türk sənət dünyasının yaşayan çinarlarından biridir.