Rafet El Roman

Rafet El Roman, əsl adı Rafet Yaşdut olan türk müğənni, mahnı müəllifi və aktyordur. 1970-ci ildə ailəsi işləmək üçün Almaniyaya getdikdə, yeddi yaşına qədər Uzunköprü Ömerbey kəndində nənəsi ilə birlikdə yaşadı. Birinci sinfi kənddə oxuduqdan sonra ailəsinin yanına, Almaniyaya getdi. Təhsilini Almaniyada başa vuran Rafet El Roman 16 yaşında mahnı sözləri yazmağa və bəstələməyə başladı. Hələ bu qədər məşhur olmamışdan əvvəl bir müddət İslam Mədəniyyət Mərkəzində Quran dərslərinə getdi. Səsinin gözəl olması səbəbilə burada ona ilahilər və azan oxutdurardılar. Buna görə də yaxın çevrəsində ona “Müəzzin Rafet” deyə müraciət edirdilər. 1988-ci ildə ilk səhnə fəaliyyətinə başladı. 1992-ci ildə Saarlaendischer Rundfunk Radio qurumu tərəfindən Almaniyada “İlin ən yaxşı istedadı” seçildi. 1994-cü ildə Frankfurt Mədəniyyət Festivalında Media Artist Award – Media Sənəti Mükafatını aldı. 1995-ci ildə Türkiyəyə gələrək ilk solo albomunu çıxardı. “Gençliğin Gözyaşları” adlı albomun satışları bir milyonu keçdi. Şəxsiyyət vəsiqəsində Yaşdut kimi qeyd olunan soyadını Almaniyada apardığı dörd illik hüquqi mübarizənin nəticəsində “El Roman” olaraq dəyişdirdi. 1996-cı ildə evləndiyi model Tuğba Altıntopdan 2003-cü ildə boşandı. Bu evlilikdən Su (d. 2000) və Şevval (d. 2003) adlı iki qızı dünyaya gəlib. Sevgilisi Yeşim Eryıldırımdan isə Edvan (d. 2010) adlı bir oğlu var. 2014-cü ildə Ceren Kaplakarslan ilə Almaniyada evlənib, 2017-ci ildə boşanıblar.