Norm Macdonald

Norman Gene Macdonald (17 oktyabr 1959 – 14 sentyabr 2021) ölüpan tərzi ilə tanınan kanadalı stendap komediyaçısı, ssenarist və aktyor idi. Karyerasının ilk illərində Roseanne sitkomu üçün ssenarilər yazır, həmçinin The Drew Carey Show və NewsRadio kimi şoularda qonaq qismində çıxış edirdi. Daha sonra beş il ərzində Saturday Night Live (SNL) verilişinin aktyor heyətində yer aldı və üç mövsüm Weekend Update rubrikasının aparıcısı oldu. SNL-dən ayrıldıqdan sonra 1998-ci ildə çəkilmiş Dirty Work filmində və 1999–2001-ci illərdə yayımlanan öz sitkomu The Norm Show-da baş rolda oynadı. 2013-cü ildə komediyaçılar və digər məşhurlarla müsahibələr apardığı Norm Macdonald Live adlı videopodkasta başladı. 2018-ci ildə podkastına bənzər formatda hazırlanmış Netflix tok-şousu Norm Macdonald Has a Show-u təqdim etdi. Karyerası boyunca çoxsaylı filmlərdə rol aldı və Conan, Late Night with David Letterman və The Howard Stern Show kimi tok-şoulara qonaq oldu. Həmçinin, xüsusilə Mike Tyson Mysteries cizgi serialında olmaqla, səsləndirmə aktyoru kimi də fəaliyyət göstərib. Paste jurnalı onu bütün dövrlərin 50 ən yaxşı stendap komediyaçısı siyahısında 31-ci yerə layiq görüb.