Dünya premyerasını etdiyi Kann Film Festivalında "Qızıl Palma Budağı"na layiq görülən bu "Hiçkoksayağı məhkəmə filmi", bir evliliyin dinamikasını araşdıran psixoloji trillerdir. "Birinin şəxsi həyatı başqasının cəhənnəmidir" fikrindən yola çıxan "Bir Düşüşün Anatomisi", Fransa Alplərindəki bir daxmada əri Samuel və görmə qabiliyyəti olmayan oğlu ilə təcrid olunmuş həyat sürən alman yazıçısı Sandranın hekayəsindən bəhs edir. Samuel yüksəklikdən yıxılaraq ölür, lakin istintaq nəticəsində ölüm səbəbinin intihar, yoxsa bədbəxt hadisə olduğu dəqiqləşməyincə, Sandra qətl ittihamı ilə həbs olunur. Samuelin ölümünün araşdırıldığı məhkəmə prosesi, cütlüyün çətin münasibətlərinin dərinliklərinə enən narahatedici və xoşagəlməz bir psixoloji səyahətə çevrilir.