Film, mövzusunu “Gözəl və Çirkin” nağılından götürür. Tacir Maurice (Kevin Kline) Fransanın bir qəsəbəsində, kiçik bir evdə qızı Belle (Emma Watson) ilə yaşayır. Belle xoşniyyətli, ağıllı və kitablara marağı olan biridir. Bütün qəsəbə Belle-ə heyrandır, lakin o, evlilik haqqında düşünmür. Qəsəbənin özündən razı yaraşıqlısı Gaston (Luke Evans) daim Belle-in arxasınca düşsə də, Belle ona heç bir şans vermir. Maurice bir səyahətdən qayıdarkən canavarların hücumuna məruz qalır və böyük bir qalaya sığınır. Heç kimin olmadığı bu qalada dincəlir və bağdakı güllərdən birini Belle-ə aparmaq üçün qoparır. Bu güllər pis bir sehr nəticəsində bədheybətə çevrilmiş Beast-ə (Dan Stevens) məxsusdur və o, tacirin hərəkətinə qəzəblənərək onu zindana atır. Atasını xilas etmək üçün Belle özünü fəda edərək Beast-in əsiri olmağa razılaşır. Bu sehr bütün xidmətçiləri əşyaya çevirib və qaladakı bu pis sehri yalnız əsl sevgi poza bilər.