Ceren Moray

Ceren Moray Brun (5 iyun 1985-ci ildə Diyarbəkirdə anadan olub) Kavak Yelleri və O Hayat Benim seriallarında canlandırdığı rollarla tanınan türk aktrisadır. Doğumundan bir neçə il sonra ailəsi ilə birlikdə İstanbula köçən məşhur aktrisa teatr təhsilinə kiçik yaşlarında başlayıb. Uzun müddət Pera Gözəl Sənətlərdə təhsil alan aktrisa 2005-ci ildə Haliç Universitetinin Teatr fakültəsinə qəbul olub və 2009-cu ildə universiteti bitirib. İlk televiziya təcrübəsi 12 il əvvəl yayımlanan, baş rollarını Levent Üzümcü və Müjde Ar kimi aktyorların paylaşdığı Serseri Aşıklar serialı olub. Bu serialdan sonra televiziya dünyasının qapıları onun üzünə açılıb. Bir neçə il televiziyaya fasilə verərək təhsilini davam etdirən Moray 2007–2010-cu illərdə Kanal D-də yayımlanan və dövrünün fenomen gənclik serialı olan Kavak Yelleri-də Su obrazını canlandırıb. Əsl böyük uğurunu isə Fox TV-də yayımlanan O Hayat Benim serialındakı Efsun obrazı ilə qazanıb. 2017-ci ilin sentyabrında fransız sevgilisi Nicco Brun ilə evlənib.