Kino tarixinin ən çox mükafat qazanmış və ən geniş heyətə malik filmlərindən biri olan "Son İmperator" epik bir hekayədir: 2 yaşında taxta çıxan Çinin son imperatoru Pu İ-nin gözü ilə 60 illik bir dövrün təsviri. Çəkilişləri 2,5 il davam edən və 19 mindən çox insanın rol aldığı bu film, olduqca zərif və estetik baxımdan möhtəşəm bir ekran əsəridir. Bertoluççi kinosunun izlərini daşıyır: Qadağan Şəhərin həyətində minlərlə fiqurantla çəkilən səhnələrdən tutmuş, ipək mələfələr altında sevişən üç bədənin siluetlərinə qədər... "Son İmperator", həmçinin Bertoluççinin "Şərq trilogiyası"nın ilk filmidir. Bu silsilə rejissorun sonrakı illərdə çəkdiyi "Səhrada çay" və "Kiçik Budda" filmləri ilə tamamlanır.