Hindistandan Kanadaya yola düşən yük gəmisi faciəvi şəkildə batır və göyərtəsindəki demək olar ki, bütün canlılar tələf olur. Uçsuz-bucaqsız Sakit okeanın ortasında tək qalan xilasedici qayığın sağ qalan heyəti isə bir kaftar, ayağı sınmış zebra, oranqutan, Riçard Parker adlı üç yüz kiloqramlıq Benqal pələngi və Pi adlı 16 yaşlı hindistanlı oğlandan ibarətdir. Heyvanxana işlədən və heyvanları ilə birlikdə köç edən Pi-nin ailəsi gəmi qəzasında həlak olur. Pi ümidsiz görünən bu okeanda, kiçik bir qayıqda heyvanlarla birlikdə sağ qalmaq uğrunda mübarizə aparır və iti zəkası, həmçinin zooloji bilikləri sayəsində qida zəncirinin qurbanı olmur. Lakin o, indi Benqal pələngi ilə qayıqda tək-tənha qalıb. Nəhəng pələngə yem olmamaq üçün heyvanla dil tapmağın və yaxınlaşmağın yollarını axtarır. Bu qeyri-adi səyahət sona çatmamış o, sehrli bir adaya çatacaq.