Giannaris, "Eve Dönerken" filmini 1999-cu ildə Şimali Yunanıstanda baş vermiş real hadisə əsasında lentə alıb. Əslən alban olan bir şəxs şəhərlərarası sərnişin avtobusunu girov götürür və sərnişinləri buraxmaq müqabilində 500.000 avro tələb edir. Əlində avtomatik silah və əl qumbarası olan şəxsin puldan başqa bir istəyi də var: maneəsiz şəkildə Albaniyaya keçməsinə şərait yaradılması. Qısa müddətdə polis tərəfindən mühasirəyə alınan avtobusda ölüm-dirim savaşı başlayır. Əvvəlcə sərt görünməyə çalışan cinayətkar sonradan yumşalır və yeddi nəfər istisna olmaqla, avtobusdakı bütün girovları sərbəst buraxır. "Eve Dönerken" filmində Giannaris Amerika döyüş filmlərini xatırladan bir mövzuya toxunub. Gərginlik Hollivud trillerlərindəki qədər yüksək olmasa da, xüsusilə dialoqlar Yunanıstan-Albaniya münasibətlərini və insan təbiətini olduqca uğurla əks etdirir.