2007-ci il Kann Film Festivalında "Qızıl Palma Budağı" mükafatını qazanmış və böyük rəğbət toplamış "4 ay, 3 həftə, 2 gün" filmində rumıniyalı rejissor Kristian Munciu bəzək-düzəksiz, demək olar ki, çılpaq bir realizmlə totalitar cəmiyyətdəki soyuqqanlı ədalət anlayışını arzuolunmaz bir əməlin fərdi nəticələri fonunda ifşa edir. "Qızıl dövrdən hekayələr" adlı layihənin bir hissəsi kimi nəzərdə tutulan və şəhər əfsanələri ilə fərdi çətinliklər ətrafında cərəyan edən hadisələrdən bəhrələnərək kommunizm dövrü Rumıniyasının mülki tarixinə subyektiv baxış sərgiləyən film, rejimin son illərində kiçik bir qəsəbədə yaşayan tələbə yoldaşları Otilia və Qabitanın hekayəsindən bəhs edir. İstəmədiyi hamiləlikdən əziyyət çəkən Qabita Otiliadan kömək istəyir. Otilia dostu üçün ucuz bir oteldə otaq tutur və Qabita bu vəziyyəti aradan qaldıracaq abort həkimi cənab Bebeni gözləməyə başlayır. Qabita cəzadan və təhqirdən qaçmaq üçün hər şeyə hazırdır, lakin heç nə göründüyü qədər asan olmayacaq.