1968-ci ildə hələ iyirmi yaşında olarkən əvvəlcə Çikaqonun, daha sonra isə bütün ABŞ-ın ən tanınmış siyasi qaradərili simalarından birinə çevrilən Fred Hampton, sosialist ideologiya ilə qaradərililərin hüquq mübarizəsini birləşdirərək daha yaxşı bir gələcək ümidi ilə ABŞ-dakı müxtəlif etnik qrupları bir araya gətirməyi bacarmışdı. 60-cı illərin ABŞ-ında sistemə qarşı çıxan demək olar ki, hər bir azlıq təmsilçisi kimi o da FTB tərəfindən hədəf alınmış və 4 dekabr 1969-cu ildə sui-qəsd nəticəsində öldürülmüşdü. Hamptonun yaxın çevrəsinə sızan FTB məlumatçısı William O'Neal-ın ötürdüyü kəşfiyyat məlumatları Hamptonun sui-qəsdinə zəmin yaratmışdı.