Christien Anholt

Vikipediyadan, azad ensiklopediya. Christien Alexis Anholt (25 fevral 1971-ci ildə anadan olub) Relic Hunter televiziya serialında Nigel Bailey rolu ilə daha çox tanınan ingilis teatr, televiziya və kino aktyorudur. O, aktyor Tony Anholtun oğludur. Christien Anholt Londonda anadan olub və aktyorluq karyerasına 1988-ci ildə, 17 yaşında başlayıb. O, Reunion filmində “Hans” rolunu qazandıqdan sonra bu sahəyə qədəm qoyub. Anholt həmin filmə görə 1989-cu ildə Kann Film Festivalında Ən yaxşı aktyor nominasiyasına layiq görülüb. Daha sonra 1990-cı ildə Siciliyada keçirilən E'Febo Doro mükafatında Ən yaxşı aktyor mükafatını alıb. Reunion filminin ssenarisini yazan Harold Pinter Anholtu dramaturq Ronald Harvuda tövsiyə edib. Harvud onu Albert Finninin rol aldığı Another Time pyesində “Leonard/Ceremi Lands” obrazına çəkib. Daha sonra Harvud Anholtu rejissor Franco Zeffirelliyə tövsiyə edib və Zeffirelli onu Mel Gibsonla birlikdə Hamlet (1990) filmində “Marcelus” roluna çəkib. Anholt Hallmark şirkətinin istehsalı olan One Against the Wind filmində Kate Beckinsale, Sam Neill və Judy Davis ilə, John G. Avilsdenin rejissoru olduğu The Power of One filmində isə Stephen Dorff ilə tərəf-müqabil olub. Steven Spielberg Anholtu yüksək rəylər alan Class Of '61 televiziya serialının pilot bölümündə Clive Owenin canlandırdığı obrazın qardaşı “Terry O'Neil” roluna seçib. O, BBC-nin “Screen2” layihəsi olan Money For Nothing filmində “Gary Warrell” obrazını canlandırmasına görə müsbət rəylər alıb. Anholt həmçinin Rachel Weisz ilə birlikdə Seventeen filmində, eləcə də Alan Bates və Richard E. Grantla BBC-nin Hard Times ekran əsərində rol alıb. The Harpist filmi ona 1997-ci ildə bu dəfə Cenevrə Film Festivalında daha bir Ən yaxşı aktyor nominasiyası qazandırıb. Bundan sonra Preaching to the Perverted, The Ruby Ring və George Miltons' Appetite filmlərində çəkilib. Anholt Terence Rattiganın In Praise Of Love əsəri ilə Vest-End səhnəsinə qayıdıb və yenidən Harold Pinter tərəfindən seçilib. Bu dəfə rejissor David Jonesun quruluşunda, Pinterin özünün də rol aldığı The Hothouse trillerində oynayıb. 1999-cu ildə Anholt Tia Carrere ilə birlikdə Relic Hunter serialında baş rollardan birini — “Nigel Bailey” obrazını canlandırıb. Serial üç mövsüm və 66 bölüm davam edib. Sonralar Anholt Michael Biehnlə birlikdə Adventure Inc serialının iki bölümündə qonaq aktyor kimi çıxış edib və The Conclave filmində kiçik rolda görünüb. O, Birinci Dünya müharibəsindən bəhs edən Flyboys dramında James Franco və Jean Reno ilə, Dark Corners filmində isə Thora Birch ilə birlikdə rol alıb. Anholt həyat yoldaşı Carly ilə birlikdə Kaliforniyanın Los-Anceles şəhərində yaşayır. Yuxarıdakı təsvir CC-BY-SA lisenziyası ilə yayımlanan Christien Anholt məqaləsindən götürülüb; müəlliflərin tam siyahısı Vikipediyada mövcuddur.