“They Shall Not Grow Old”, Birinci Dünya Müharibəsi dövründə çəkilmiş və əvvəllər heç yerdə nümayiş olunmamış görüntülərdən istifadə edərək, Böyük Müharibənin əsgərləri və onun təsirləri haqqında fövqəladə bir baxış təqdim edir. Fantastik kinonun şah əsərləri olan “The Lord of the Rings” və “The Hobbit” trilogiyalarının 3 Oskar mükafatlı rejissoru Peter Jackson, 2014-cü ildə ekranlara çıxan “The Hobbit: The Battle of the Five Armies” filmindən sonra ilk dəfə böyük ekrana qayıdır. Sənədli film üçün İmperiya Müharibə Muzeylərinin arxivindəki görüntülər müasir texnologiyadan istifadə edilərək bərpa edilib və BBC arxivlərindən götürülmüş səslər sayəsində Böyük Müharibəni yaşamış insanları öz səsləri ilə dinləmək mümkün olacaq. Filmin prodüserliyini rejissorla birlikdə Clare Olssen üstlənib.