Saroo Brierley-nin öz həyat hekayəsini qələmə aldığı “A Long Way Home” kitabından uyğunlaşdırılan filmdə, 5 yaşlı hindistanlı Saroo böyük qardaşının qayıtmasını gözləyərkən qatar vaqonunda yuxuya gedir. O yatarkən qatarın hərəkətə başlaması nəticəsində balaca Saroo ayıldıqda özünü evindən minlərlə kilometr uzaqda tapır. Artıq o, itib və evinə necə qayıdacağı barədə heç bir fikri yoxdur. Kalkütada tək qalan Saroo, böyük çətinliklərdən sonra avstraliyalı bir cütlük tərəfindən övladlığa götürülür və sevgi içində böyüyür. Lakin ailəsini tapmaq arzusu getdikcə bir saplantıya çevrilir. Əlində heç bir ipucu olmadan irəliləməyə çalışan gəncin içindəki çarəsizlik zamanla həyatına da təsir etməyə başlayır.