Məşhur qorxu romanları müəllifi Clive Barker-in "Books of Blood" əsəri əsasında çəkilən film, məkan və zamanın kəsişdiyi üç fərqli hekayəni təqdim edir. Tamaşaçını kəşf olunmamış bir dünyaya səyahətə çıxaran filmdə Anna Friel, yeddi yaşlı oğlunu lösemi xəstəliyindən itirən psixoloq Meri obrazını canlandırır. Merinin yeni sevgilisi Saymon ona dünyasını dəyişmiş oğlu ilə danışa biləcəyini deyir. Digər tərəfdən, Robertsonun canlandırdığı Cenna obrazı səslərə qarşı həssaslıq (mizofoniya) xəstəliyindən əziyyət çəkir və anasının onu yenidən fermaya göndərəcəyini öyrəndikdə Los-Ancelesə qaçır. Üçüncü hekayədə isə qiymətli bir kitab taparaq həyat yoldaşı ilə birlikdə cinayət aləmindən uzaqlaşmağa çalışan bir qatilin taleyindən bəhs edilir. Bu obrazı isə Yul Vazquez canlandırır.