Hələ öz həyatını qaydaya sala bilməmişkən gənc yaşda ata olması Calumu alt-üst edir. Həyat yoldaşından ayrılır, işlərini tam yoluna qoya bilmir, filmin ortalarında qızı ilə etdiyi söhbətdən də başa düşürük ki, çox da pul qazanmır. Onsuz da qızı Sophie ilə məktəblər açılmamışdan əvvəl getdikləri yay tətilini də olduqca ucuz başa gətirib. Bir ata-qız və böyümə hekayəsi, xatirələrin hüznü və sevinci ilə dolu, zamanın sürətlə keçidindən bəhs edən sadə, incə bir dram... Sophie, düz 20 il əvvəl Fəthiyədə bir istirahət mərkəzində atası ilə keçirdiyi tətilin unudulmaz anlarını keçmişə duyduğu melanxoliya ilə xatırlayır. Atasını tanıdığını düşünsə də, illər sonra xatırladıqları ilə reallıq arasında boşluqlar qalır.