Sərsəri ruhlu Co 1950-ci illərin Şotlandiyasında Qlazqo ilə Edinburq arasında işləyən gəmilərdən birində iş tapır. Gəmi sahibi Les ilə dostlaşır və vaxt keçirməyə başlayırlar. Bu arada o, Lesin arvadı Ellanı yoldan çıxarmaqdan da çəkinmir. Bir gün axşamüstü Co və Lesin suda tapdıqları gənc qadın cəsədi ilə bağlı polis araşdırması başlayır. Conun Keti adlı bu qadınla keçmişi olduğu üzə çıxdıqda, Ella ilə münasibəti də daha ehtiraslı bir hal alır. Şotlandiyanın "Beat" ədəbiyyatının ən görkəmli nümayəndəsi şübhəsiz ki, Aleksandr Trokkidir. Mükafatlı rejissor Devid Makkenzinin yazıçının kult romanı əsasında çəkdiyi bu ekran işi Devid Birnin musiqiləri ilə bəzədilib. Baş rollarda Euan Makqreqor və Tilda Suinton çıxış edir.