Hunter, həyat yoldaşı ilə birlikdə kimsəsiz bir malikanədə yaşayır. Zərif duruşu, evin içində belə səliqəli saçları və geyimləri ilə gəzişən Hunter, sanki qəfəsə salınmış Marilyn Monroe-nu xatırladır. Qapalı bir həyat sürən Hunterin ünsiyyətdə olduğu insanlar yalnız həyat yoldaşı Richie-nin ailəsi və yaxın çevrəsidir. Bədbəxt olduğunu gizlətmək üçün kiçik məşğuliyyətlərlə fikrini yayındırmağa çalışır. Hamilə olduğunu öyrəndikdən sonra gizlətdiyi depressiya daha da dərinləşir və həyatına rəng qatmaq üçün evdəki müxtəlif əşyaları udmaq kimi ağrılı bir vərdiş qazanır. (Pika sindromu adlanan bu xəstəlik ən çox uşaqlarda və hamilələrdə müşahidə olunur. Bədəndəki mineral çatışmazlığından qaynaqlana bildiyi kimi, psixoloji problemlərin də xəbərçisi ola bilər.) Hunter getdikcə daha təhlükəli əşyaları udmağa davam edəcək və vəziyyət nəzarətdən çıxdıqca həm keçmişi, həm də həyat yoldaşı ilə üzləşmək məcburiyyətində qalacaq.