Film, 1951-ci ildə Koreya müharibəsi zamanı cəbhə arxasında yerləşən və MASH (Səyyar Ordu Cərrahiyyə Xəstəxanası) adlanan səhra xəstəxanalarından birində çalışan, aralarında 'qəssab' kimi tanınan bir qrup cərrah və tibb heyətinin macəralarından bəhs edir. Bu cərrahların heç biri peşəkar hərbçi deyil; onlar mülki xəstəxanalardan gəliblər. Buna görə də, bu çadır xəstəxanalarda hərbi intizamdan əsər-əlamət yoxdur. Hər gün edilən ağır əməliyyatlar, kəsilən əzalar, ölən insanlar və müharibənin digər acıları arasında onlar öz əsas vəzifələrini yerinə yetirməklə yanaşı, gülməyə, əylənməyə və zarafatlaşmağa da vaxt tapırlar. Filmdə bir dənə də olsun döyüş səhnəsi olmasa da, MASH ən böyük müharibə əleyhinə filmlərdən biri hesab olunur.