Ailəsi ilə birlikdə İngiltərədə yaşayan 18 yaşlı Cessin valideynləri onun nəzakətli və hind ənənələrinə bağlı bir gənc qız kimi böyüməsini istəyirlər. Lakin Cessin yeganə bir arzusu var: Devid Bekhem kimi futbol oynamaq! Bir gün parkda top qovarkən Cess Culsun diqqətini çəkir. Culs ona yerli qızlardan ibarət futbol komandasında oynamağı təklif edir. Eyni yaşda olan və eyni arzunu bölüşən iki gənc qız tezliklə dostlaşırlar və komandalarının uğurları günü-gündən artır. Hər ikisinin ailəsi qızlarının futbol topu dalınca qaçmasından son dərəcə narahatdır. Cessin ailəsi onun nə üçün hüquq fakültəsinə getmədiyini və bacısı Pinki kimi münasib bir gənclə nişanlanmadığını soruşur. Pinkinin başına gələcəklərdən isə hələ xəbərsizdirlər! Culsun anası da digər qızlar kimi geyinməyən qızının necə sevgili tapacağı barədə narahatlıq keçirir. Əslində isə Culs topun deyil, komandalarının yaraşıqlı məşqçisi Co-nun arxasınca qaçır!